නුඹ සකුරා මලක්, අනුරාගයේත් ආදරයේත් සුවඳ අරගෙන මගේ ජීවිතයට පිපුණු. නුඹ වගේ ම සකුරා මල් යායක් මගේ අවට තිබුණා. සුරූපිණියන්, ආදරය දෙන්න සැදී පැහැදී උන්නු යුවතියන් ගණන් කළ නොහැකි තරමක් මගෙ ජීවිතයට ගොඩවදින්න තිබුණා. ඒත් …….
පරසතු සුවඳක් මම නොම වින්දෙමි සකුරා යායේ
පරසතු කුසුමක් මම නොම නෙලුවෙමි සකුරා යායේ
සකුරා පෙති ගිලිහෙන මහා ගහට මම පෙම්බැන්දේ
සකුරා මලේ පෙති ගිලිහී හඬා වැටේ
ඒත් නුඹ තමයි මගේ සකුරා මල. මගේ එක ම සකුරා මල. අනුන් සතු සකුරා මලක සුවඳක්වත් මම වින්දේ නැහැ. මම නුඹ හැරෙන්නට වෙනත් මලක් නෙලුවෙත් නැහැ. සකුරා යායකින් මගේ අතින් පෙති ගිලිහුණේ නුඹේ ම පමණයි. නුඹ මට මහා ගහක් වෙලා සෙවණ දුන්නා. මම නුඹේ ඒ සෙවණට, නුඹ ට පෙම් කළා. විශ්වාස කරන්න, නුඹ ට ආදරය නොකරන්න මට හේතුවක් නැහැ….
කඳුළු පිළියමක්
උඹට වියැකෙන්න හනමිටින්
සමාජේ අනියමත් දාවි උඹේ කරපිටින්
සිනමා තිරේ අපේ යථාර්ථයක් කනපිටින්
මගේ පදාර්ථයේ පිටපතක් කුසේ උඹේ පණපිටින්
යදින්නෙපා දීග, සිඳලන්න බැරි දොළ දුකක්
උඹයි කාර්යභාරය හුදෙක් භාර්යාව ගැරහුවත්
මගේ රහසක නිම්හිම් නිම්නයක
කලවල ඉහන් උඹත් ගිම් හිම් ඩිම්බයක
කඳුළු කියන්නෙ හිත හදන්න පුළුවන් පිළියමක්. නුඹ ම දන්නවා මගේ සකුරා මල, විවාහයක් කියන බැඳීමෙන් පිටදි වුණත් විවාහය ඇතුළෙ වුණත් දරුවෙක් කියන්නෙ දරුවෙක්. නුඹේ කුසේ නුඹේත් මගේත් සිහිනයක් පණගැහෙනවා. අපි නීතියෙන් බැඳිලා උන්නා නම් මිනිස්සු අපේ ආදරේ සිනමා පටයක් වගේ දකීවි. ඒත්, නොහිතුව විදියට අපේ කතාවෙ සිදුවීම් පෙළගැස්ම වෙනස් වුණා. ඒත් දීගයක් ඇතුළෙ විතරද දොළදුකක් දොළදුකක් විදියට පේන්නෙ? මගෙ සකුරා මල, හිත හැදෙනකල් අඬන්න. හිත හදාගෙන, සමාජය ඔයාගෙ හිතට පුරවන හනමිටි අදහස් අතහරින්න. සකුරා මල් යායක් මැද්දෙ මම නෙලපු එකම සකුරා මල නුඹ. මට වෙන මල් නෙලන්න ඕනෙ නැහැ. සදහට ම ඔයයි මගෙ බිරිඳ, ඒක නුඹත් හොඳට ම දන්නවා.
ගිනි තියන් ඕම negative පටි
ඔය හැසිරීම මට ගබ්සාවේ දොරටු අරී
මිරැන්ඩා දැන් උඹ ආත්මාර්ථකාමී
වග නොකියන්න ජාතකේට මා ප්‍රාර්ථනා වී
කිමෝනාව කඩතුරක් ගැබත් උඹ දරාගෙන
උඹේ පරාර්ථය ලතැවෙන්නේ ලය පලාගෙන
වෛරය වැදෑමහක්, මතකයන් පරායන්න
දෙන්න මට සැලෝලයිඩ් හීනෙට මගේ පලායන්න
මිනිස්සු ඔයාගෙ හිතේ පුරවන හැම negative දෙයක් ම අතාරින්න. අපට පුළුවන් අපේ පණ ගැහෙන හීනෙ ගැන තව හීන දකින්න. සම්ප්‍රදායෙන් වැහිලා බයවෙවී ජීවත්වෙන්න ඕනෙ නැහැ, මම කියන දේත් අහන්න. ආත්මාර්ථකාමී වෙන්න එපා, පරාර්ථකාමී වෙලා මගේ හීනයට මාත් එක්ක ඇවිදයෙන එන්න. වෛර කරන්න එපා, එයාට ඔයාගෙ කුසේ වැඩෙන්න ඉඩ දෙන්න. සකුරා මල් යායක් මැද්දෙ මම නෙලපු එකම සකුරා මල නුඹ. මට වෙන මල් නෙලන්න ඕනෙ නැහැ. සදහට ම ඔයයි මගෙ බිරිඳ, ඒක නුඹත් හොඳට ම දන්නවා.
සකුරා මලේ අද මා ළඟ හඬා වැටේ
සකුරා මලේ වෙනදා මෙන් සුවඳ නැතේ
හිමි නොවෙනා ප්‍රේමේ
ලුහුබඳිනා ප්‍රේමේ
සකුරා මලේ අද මා ළඟ හඬා වැටේ
අද නුඹ මං ළඟ හඬාවැටෙනවා. නුඹ බයවෙලා, මම දන්නවා. ඇත්ත, මම නුඹ ළඟ වෙනදා තරම් අද අනුරාගී නොවෙනවා වෙන්න ඇති. ඒත් ඒකෙන් කියන්නෙ මගේ ප්‍රේමය නුඹට හිමි නොවෙනවා කියලා නොවෙයි. නුඹ මගේ පසුපසින් ලුහුබඳිමින්, මගේ ළඟ හඬාවැටෙන්න ඕනෙ නැහැ. නුඹේ කුසේ මගේ දරුවෙක් වැඩෙනවා කියන්නෙ මට නුඹව අතහරින්න කරුණක් නොවෙයි. දන්නවද, නුඹ තමයි බිරිඳ….. විවාහ වුණත් නොවුණත්. නුඹ ම විතරයි.
නිබඳ දෙව්දු වත සියුම් වලා බැමි
මුහුලස උර බෙත්මේ කඩා වැටී
මා දළු රෝස ඵලයට හඬා වැටී
පුර සකුරා සිසිරය පතනවා ඇතී
දෙව් රුවක් වගේ නුඹේ වතේ සියුම් මෘදු පහස තුළ මම ගිලෙනවා හෙටටත්. වලාකුළුවල සියුම් බව රැඳි ළය තුරේ, උරහිසේ දැවටෙමින් මම නිවෙනවා. මගේ සකුරා මල, වසන්තයන්, ගිම්හානයන්, සිසිරයන් ගණනාවක් ගෙවී යද්දෙන් …….. මම නුඹේ පහස ම පතනවා, නුඹේ ළඟ ම රැඳෙනවා ….. මම පෙම් කළේ නුඹ ට විතරයි. නුඹට ම විතරයි. මං නිසා පෙති ගිලිහුණේ නුඹේ විතරයි. ඉතින් හඬාවැටෙන්න එපා. මගේ සකුරා මල, මම නුඹේ ම විතරයි. සදහට ම.
ඉතින්, ඔබ මේ සටහන මෙතෙක් දුරට කියවා අවසන් නම් නම් දැනටමත් දන්නවා ඇති මේ සටහන ලියවුණේ කුමක් පදනම් කරගෙනද කියලා. චරිත අත්තලගේ සහ හසංක වික්‍රමරත්න යනදෙපළගේ පද රචනයක් වුණ ‘සකුරා’, චරිත අත්තලගේ සහ මනසික් ගේ හඬින් යූටියුබ් අවකාශයට මුදාහැරුණේ 2020 වසරේදියි. එය අද වන විට නැරඹුම් වාර මිලියන 1.2ක් පසුකර තිබෙනවා. ප්‍රේමය පිළිබඳ ලියවුණු මේ අපූරු ගීතය අර්ථයත් සමග නැවතත් රසවිඳින්න ආරාධනා කරමින් සකුරා මල ගැන ලියවුණු සටහන මෙතෙකින් නිමාකරනවා. (ගීතයට අදාළ සබැඳිය: https://youtu.be/RdF4wUPhAcg?si=XJf-wPqhSQarv0x1 )
ස්වර්ණමාලි කීරගල
